Home Empowerment ඔයා වැඩිපුරම ආදරය කරන්නෙ කාටද?

ඔයා වැඩිපුරම ආදරය කරන්නෙ කාටද?

 
පුංචි කාලෙ ඉදලා මැරෙන්න මොහොතකට කලිනුත් අපිට අහන්න පුළුවන් තුන් කාලයටම ගැලපෙන ප්‍රශ්නයක් තමයි, ඔයා කාටද වැඩියෙන්ම ආදරේ කරන්නෙ කියන එක. 
 
නොතේරෙන පුංචි කාලෙදි අපි උත්තර දෙන්නෙ අම්මා, අප්පච්චි නැත්තන් සීයාට, ආච්චිට , අක්කාට , මල්ලිට කියලා ඕනම පුද්ගල චරිතයක් ගැන වගේම තමන් ඇති කරන සුරතලා ගැන වුනත් කියන්න පුළුවන්. පිංකිට, ටොමීට , දිගාසිරිට ඔය ඕනම නමක්. ඇත්තටම එහෙම වෙන්නේ ඔය කියන කව්රුන්ම හරි අපේ හදවතට දැනුන, හිතට ලග, අපිට දැනෙන්න ආදරය කරන කෙනෙක් ගාව අපේ හිත් නැවතෙන නිසා නේද ? 
 
නමුත් අපි වයසින් වැඩෙන්න වැඩෙන්න අපේ සිතුවිලි වෙනස් වෙනවා. අපි ලෝකය දකින විදිය වෙනස් වෙනවා. අපිට, අපි වටේට ඉන්න අයව දැනෙන විදිය වෙනස් වෙනවා. අවසානයෙදි තැනක් එනවා අපි ඇත්තටම අපිට ආදරේ කරන්න පටන් ගන්න.අන්න එතන තමයි ඔබ හොයන ජීවිතය ඔබ දකින්න පටන් ගන්න තැන. ඔබේම අරමුණකට ඔබව මෙහෙයවන්න පටන් ගන්න තැන. කිසිම දේකට ඔබව පරද්දන්න බෑ කියලා හිතෙන්න ගන්න තැන.  එතන තමයි තැන, ඔබ ඔබව සොයාගෙන යන ගමනේ ආරම්භය.
 
ඔබේ ජීවිතයේ ඉදලා තියෙනවද පණ වගේ ආදරේ කරපු මිනිස්සු? ඔබ පුදුම තරම් විශ්වාස කරපු මිනිස්සු? ජීවිතේ ඔබට ඉදලා තියෙනවද ඕනම වෙලාවක ඕනම දේකට ඉන්නවා කියලා කියපු මිනිස්සු? ඒ කිව්ව අය මේ වෙද්දිත් ඔබ ගාව ඉන්නවද? ඔබ වැටුන වෙලාවෙ අතින් අල්ල ගන්න ඉන්නවා කිව්ව අය ඔබ වැටෙද්දිත් ලග හිටියද? එහෙම ඉන්නවා නම් ඔබ මේ ලෝකෙ අතලොස්සක් තරම් වාසනාවන්ත මිනිසුන්ගෙන් කෙනෙක් වෙන්න ඇති. නමුත් ගොඩක් අය ගාව ඒ කිව්ව අය නැතිව ඇති.මොකද ජීවිතේ මිනිස්සු තැන දෙන්නෙ තමුන්ට තියෙන අවශ්‍යතා හා උවමනා වලට මිස ජීවිතයේ තියෙන වටිනාකම් වලට නොවන නිසා. 
 
ජීවිතේ වැඩිපුරම ආදරය කරපු මිනිස්සු රිද්දපු අවස්ථාවල් ඕන තරම් ඇති, විශ්වාස කරපු මිනිස්සු හිතුවෙවත් නැති වෙලාවක ඒ විශ්වාසය බිදලා දාන්න ඇති, එහෙම වුනාම ඒ දේවල් දරාගන්න බැරුව ජීවිතේ අඩියටම වැටිලා නැගිටගන්න බැරි වුන අවස්ථා ඔබට ඇති. නමුත් ඔබ මේ වෙද්දි නැගිටලා ඇති. ඔබ ඒ නැගිට්ටෙ කවුරු වෙනුවෙන්ද කියලා හිතලා බැලුවොත් ඔබ කියයි ගොඩක් පුද්ගල නාම ඔබ වටේට ඉන්න. ඒත් ඒ කතාවෙ අන්තිම අඩියට ගිහින් බැලුවොත් ඔබ හරියටම දකීවි කවුරු වෙනුවෙන්ද ඔබ නැගිටලා තියෙන්නේ කියලා. ඔව් ඇත්තටම ඒ ඔබ වෙනුවෙන්.  ඔබ විතරමයි එතන ඉන්න එකම කෙනා “ඔහොම ඉදලා බෑ, නැගිටින්න ඕන ” කියලා 
 නැගිටින්න ඔබට හයිය දෙන. අනික් අය පෙලගැහෙන්නෙ ඊට පස්සෙයි. 
 
ජීවිතයේ ආදරය කරපු මිනිස්සු අතින් මමත් ප්‍රතික්ෂේප වෙලා තියෙනවා. විශ්වාස කරපු මිනිස්සු හිතාගන්න බැරි වුන අවස්ථා වල ඒ විශ්වාසය බිද දාලා ගිහින් තියෙනවා. ජීවිතේ නැගිටගන්න බැරි වෙයි කියලා හිතපු අන්තිම අඩියටම මම වැටිලා තියෙනවා. මගේ හිත කැඩිලා තියෙනවා , ඒ හිත බිදිලා තියෙනවා. ඒත් අන්තිමට මම ඒ ඔක්කොම කෑලි එකතු කරගෙන හිනාවෙලා නැගිටලා තියෙනවා. ඔව් ඒ මම වෙනුවෙන්. මම අදටත් මගේ ජීවිතේ වැඩිපුරම ආදරේ කරන්නෙ මට. මම සුවපහසුව සලසන්නෙ මට.මම පරිස්සම් කරන්නෙම මගේ හිත. ඒකට මට හේතු ගොඩක් තියෙනවා. ඒ තුල මගේ පැවැත්ම, පැවතීම තුල, මම, මා වටා සිටින අන් සියලු දෙනාටම සහනයක් වෙනවා. ඔවුන්ගෙ සුව පහසුව සලසනවා.  ඒකයි කියන්නේ ඔබ ඔබට ආදරේ කරලා ඉන්න.
 
 ඔබේ ජීවිතය, ඔබ වටා සිටින අයගේ ජීවිතය ලස්සන කරන්න ඔයාට පුළුවන් වෙන්නෙ ඉස්සෙල්ලම ඔයා ඔයාට ආදරය කලොත් විතරමයි. 
ඔබේ වටිනාකම ඔබ දන්නෙ නැත්තන් ඒක වෙන කවුරුත්ම දන්නෙ නෑ. ඔබව හොදටම දන්න එකම කෙනා ඔබ විතරමයි. වටේ කවුරුවත් ඔබ තරම් හොදට ඔබ ගැන දන්නෙ නෑ ඇත්තටම. ඉතිං ඔබේ ශක්තීන් හදුනගන්න පුළුවන් එකම කෙනාත් ඔබේ දුර්වලතා දරාගන්න පුළුවන් එකම කෙනාත් ඔබ විතරමයි. මොකද ඔබ ගමන් කල පාර ඔබේ සපත්තු වලින් යන්නෙ ඔබම පමණක් නිසා, වෙන කවුරුත් ඒ පාරේ ඇවිදින්න කැමති වෙන එකකුත් නෑ සමහර විට. 
 
අපි හැමෝටම අපිටම කියලා කතාවක් තියෙනවා.
අනුන්ගේ ජීවිත පොත් වල පසුවදන් ලියන්න කලින් ඔයා ඔයාගෙ පොතේ පිටු ටික හෙමින් පෙරලලා ඉන්න. ඒ පිටු අස්සෙ නොකියවූ, කතා ගොඩක් තියෙයි ඔයාට ඔයාව හොයාගන්න උදවු වෙන.
 
ඔබට කවදාහරි ඔබව මුණ ගැහිලා තියෙනවද?
මේකට මම පොඩි තෙරපි එකක් කියන්නම්. ඔයාට ඔයාවම බලන්න ඕන නම් යන්න කණ්ණාඩියක් ලගට. එතන අනිවාර්යයෙන්ම ඔයා ඉන්නවා ඔයාගෙ හොදම යාළුවාත් එක්ක. ඒ තමයි ඔබේම ප්‍රතිබිම්භය. ඔබට කියන්න තියෙන ඕන දෙයක් එයාට කියන්න. ඔබට අඩන්න ඕන නම් අඩන්න. ඔයාට හිනා වෙන්න ඕන නම් හිනාවෙන්න. කණ්ණාඩිය ඇතුළෙ ඉන්න ඔයාව අතින් අල්ලලා බලන්න. ඒක හිත සැහැල්ලු වෙන දෙයක්. ජීවිතේ වැදගත්ම තීරණ කණ්ණාඩියක් ඉස්සරහට ගිහින් ගන්න. ඔයා කවදාවත් තනි වෙලා කියලා දැනෙන එකක් නෑ. එතනදි ඔයාට මුණගැහෙන්නෙ ඔයාට ගොඩක් ආදරේ කෙනෙක්, ඔයාව ගොඩාක් විශ්වාස කරන, ඔයාගෙ විශ්වාසය රකින කෙනෙක්, කෙටියෙන්ම කිව්වොත් ඕනම දේකදි ඔයාගෙ අත තද කරලා අල්ල ගන්න, හයිය බැදීමක් තියෙන, හිතට වැටෙන්න නොදී අල්ල ගන්න හරි ලස්සන ආදරණීයයෙක්. ඔව් ඒ ඔබමයි. ඔබට වඩා ලස්සනට ආදරය කරන්න ඔබට ඇරෙන්න මේ ලෝකෙ කාටවත්ම බෑ. ඒ නිසයි ඔබ මේ විශ්වයේ ඉහලම තත්වයේ නිර්මාණයක් වෙන්නෙ.
 
තමන්, තමන් කෙරෙහිම විශ්වාසයක් ඇතිකර ගන්න නම්, 
 
කුඩා කාලයේ පටන්ම ඔබේ දරුවාට දැනෙන්න ආදරය කරන්න.ඔහුට හෝ ඇයට ඔවුන්ගෙ වටිනාකම් සිතට ඇතුල් කරන්න. නිතරම අගය කරන්න. ඔවුන් යමක් කල හැකි අය ලෙස ඔවුන්ට දැනෙන්න දෙන්න.ඔවුන් කෙරේ විශ්වාසය තබන බව , ඔවුන්ගෙ අදහස් වලට ඔබ ගරු කරන බව දැනෙන්න දෙන්න. තමන්ට තමන් වීම තුල තිබෙන මානසික නිදහස ඔවුන්ට විදින්න දෙන්න. එවිට දරුවන් ඔව්න් පසුතැවෙන දෙයක් හෝ ඔබ දෙමව්පියෙකු ලෙස පසුතැවෙන දෙයක් කවදාවත් කරන එකක් නෑ. ඔවුන්ව පාසල් අධ්‍යාපනයේ තරග භූමියට සන්නද්ධව යැවීමට පෙර ජීවිත තරගය ජය ගැනීමට අවශ්‍ය ආත්ම අභිමානයෙන් පිරි දරුවකු තනන්න. 
 
තරුණ වියට එළැඹුන පසුත් තමන්වම විශ්වාස කරන, වැටෙන්න වැටෙන්න නැගිටින, රිදුන තැන් පිලිසකර කරගෙන කිසිවක් නොවුන සේ සිනහවෙන් දුක වහගෙන ශක්තිමත් ගමනක් යන ගැහැණියකු හෝ පිරිමියෙකු එහි අවසන් ප්‍රතිඵලය වේවි. 
 
ඔබ ඔබව සොයාගැනීමට ජීවිත කාලය තුල නිශ්චිත වයස් සීමාවක් නොමැති අතර ඕනෑම අවධියකදී ඔබට ඔබ වෙනුවෙන් නැගී සිටිය හැක. තමන් විසින් තමන්ට දෙනු ලබන විශ්වාසය මත ජීවිතයේ සියළු ජයග්‍රහණ ලැබිය හැක. අනේකාගේ ජීවිතය දෙස බලා මම දැන් වයසයි මට කාලය මදි කියා ඔබට සිතෙයි නම් ඔබ තරගයට සහභාගී නොවීම පරාජය භාරගත් අයෙකු වන අතර ඔබ තුල සිටින ඔබ එයට දක්වන ප්‍රතිචාරය අනුව ඔබේ ඉදිරිය තීරණය වනු ඇත. 
 
පලමුව ඔබ, ඔබට ආදරය කරන්න. 
මන්ද, ඔබට ජීවිතයේ ඉතිරි කාලය ගත කිරීමට සිදුවන්නේ ඔබත් සමගම නිසා. 
 
වෘත්තීය මනෝවිද්‍යා උපදේශිකා
අවේණිකා සියඹලාපිටිය
 
 

LEAVE A REPLY

Please enter your comment!
Please enter your name here